今年 2011 過得真快, 今年實在有乜事發生在我週邊呢？一年完結, 點都要數十件大事以作記錄 :

1. 晴心出世 :  六月頭, 二女順利開刀出世, 現在已經六個多月大, 開始識轉身, 食糊仔, 其間試過腳仔滾水燙傷意外, 心痛死, 好在都算輕傷, 現在都好得七七八八。

2. 盈盈入幼稚園 :  十月開學入PG歲半班, 初期以為無機會, 後來才有後補位, 都要成近四千銀一個月, 哈哈, 差不多是讀大學的學費了！讀了近三個月, 學到些什麼？哈哈, 表情多了, 跳下舞, 轉下圈, 就係咁多~~~ 不過每天早上送佢上班就令我早了回舖頭！

3. 盈盈八月中終於學識了自己行路, 哈哈, 唔駛抱咁多了！

4. 七一遊行, 響應皇上黃洋達呼籲, 晚上還參與了衝擊, 哈哈, 中了胡椒噴霧, 好痛！之後又參與了713的天下圍攻放紙飛機活動, 算是為民主出了點力！三月時也參觀了中環的打小人活動。

5. 十一月區議會選舉, 首次利用了舖面為人民力量候選人貼 poster, 也算是為人民力量作丁點出力！

6. 全年都繼續在 yahoo bid 了不少舊模型, 書籍, 反而少了出旺角買玩具。

7. 二月看了宇宙戰艦大和號電影, 很久無入戲院看電影了, 套戲就真係麻麻, 不過作為 Fans 就實要支持下。

8. 股市實在太難玩了, 今年輸少已當贏了, 唉~~~~~~~

9. 去鴻發模型砌模型和噴油, 本來都好積極, 但實在太難抽時間了, 所以近來都好少去, 唯有好好把握兩個女回元朗的寶貴時間在家作戰吧！不過遲下有模型技巧班都會抽時間去學下。

10. 執拾了全屋的模型玩具, 間屋登時整齊了, 目標就是搵定空位讓一眾未砌的模型有機會面世。

今年的確無乜特別, 最重要工作當然是湊女啦, 舖頭反而幾平淡, 今年診費慢慢加價近15%, 不過同期藥費人工等都加了不少, 而且附近的診所也加強了服務, 所以整體收入只叫平穩, 無乜進步, 唉~~~~

Anyway, 明年的挑戰應該不少, 舖頭續約應是幾麻煩, 真是不容樂觀。

星期天奮戰兩個鐘的成果 ~~ 太慢了！

RG篇　火柴人骨架

RG是Bandai全新開發的高達新系列模型，也是GUNPLA 30周年的最重點作品。筆者到場試玩過後，其火柴人般的骨架設計，賦予模型極大的活動能力，令高度約12cm的RG高達，擺甫士的能力可媲美約18cm高的MG版，尤其是胸部、腹部和腰部三者都有關節相連，拗腰能力猶有過之。外形設計參照去年的台場版1/1高達，隨盒有恍如米雕般的機身裝飾貼紙，素組亦可帶來逼真效果。

今次目標是素組+滲線+消光, 希望會順利完成啦！雖然砌得慢, 但就好欣賞 Bandai 的模型實在設計得極花心機, 好精密, 技術進步帶來的震撼一定要砌過才感受到！

五個月的晴心妹妹~~~ 開始硬淨~~~

五個月時的盈心姐姐~~~~

妹妹睇落好似傻豬d ~~~ 哈哈 ~~~

昨晚終於努力砌了一夜模型, 1/144高機動型渣古MSV, 老模番出, 於福榮街69店買的, $60, 都算幾平, 初時以為好少零件好易砌, 砌落就知中招, 大把夾口要處理打磨, 不過好在是一邊看電視和一邊聽人網節目同時進行, 咁就無咁辛苦了, 甚至是一種自得其樂, 哈哈, 有點阿Q~~

素組模樣~~~

本地高手作品 ~~~ 要好好參考先 ~~~ 不過都好難學喇, 做到幾多得幾多啦, 自娛遮！